Ancheloti: “Xames bilan muzokaralar davom etmoqda, ammo...”

“Napoli” bosh murabbiyi Karlo Anchelotti “Real” yarim himoyachisi Xames Rodrigesning neapolitanliklar safiga kelib qo'shilishi mumkinligi haqida gapirib o'tdi.

“Xames bir nechta poziciyada o'ynay oladi: hujum ortida yoki vinger rolida.. Men unga tug'ilgan kuni munosabati bilan xabar yo'llab, tabrikladim. Futbolchini o'z safimizga qo'shib olish uchun muzokaralar davom etmoqda, ammo bu jarayon ko'p vaqt talab etadi. Ushbu o'tish amalga oshmasa ham, biz kuchli jamoa bo'lishda davom etamiz,” - deya Anchelottining so'zlaridan iqtibos keltirmoqda Football Italia.

Eslatib o'tamiz, Anchelotti qo'l ostida Xames “Real” va “Bavariya”da to'p tepdi. Nemis klubida Rodriges o'tgan mavsum ham o'ynadi. Ammo myunxenliklar ikki yillik ijaradan keyin futbolchining transferini sotib olishni istashmadi.

So'nggi ikki mavsumda kolumbiyalik futbolchi “Bavariya” tarkibida 67 ta uchrashuvda (barcha turnirlarda) maydonga tushib, 15 ta gol urdi va 20 ta golli uzatmani amalga oshirdi.

Manba: www.championat.asia