Ronaldu "Real"da qolish shartini elon qildimi?

"Real" hujumchisi Krishtianu Ronaldu shartnomasi muddati oxirigacha klubda qolishga tayyor, ammo faqat bir shart bilan.

Futbolchi Chempionlar Ligasi finalidan o'rin olgan "Liverpul"ga (3:1) qarshi bahsdan so'ng, Madriddagi davri o'tganiga shama qilgan edi.

KR7 o'z agenti Jorje Mendesh orqali klub prezidenti Florentino Peresga yangi shartlarini etkazgan. El Confidencial xabariga ko'ra, Ronaldu yiliga 80 million evro maosh olishni istayapti. Barcha soliqlar chiqarib tashlangandan so'ng, bu qiymat 50 million evroni tashkil qiladi va u dunyoning eng ko'p maosh oluvchi futbolchisiga aylanadi.

Ronalduning "Real" bilan imzolagan shartnomasi 2021 yilgacha mo'ljallanganini inobatga oladigan bo'lsak, Qirollik klubi 3 yil ichida o'z etakchisiga 240 million evro sarflashiga to'g'ri keladi. Bu esa klub byudjetiga katta zarba etkazishi tufayli, Peres uning shartiga ko'nmasligi ham mumkin.

Manba: www.tribuna.uz