Tasirli voqea, biz Xulio Iglesiasni Ispaniyaning eng taniqli qo'shiqchilaridan biri sifatida bilamiz, ammo hamma ham uni "Real" darvozaboni bo'lganini eslolmaydi.
Xulio bolaligida sport faoliyati to'g'risida jiddiy bosh qotirgan – yosh ispaniyalik futbol daromad manbai ekanligini tushunib etadi. U sport olamida muhim shaxs bo'lishni orzu qilar, o'zini "Real"ning asosiy o'yinchisi sifatida ko'rib, jamoa bilan ko'plab kuboklarni yutishini tasavvur qilardi. Ha, 16 yoshdan 20 yoshgacha darvozabon sifatida o'ynagan Iglesias chindan ham istedodli futbolchi edi.
Ispan 16 yoshida "Real Madrid" akademiyasida paydo bo'ldi. Klub bu davrda haqiqatan ham ajoyib damlarni o'tkazayotgan edi, chunki ketma-ket besh marta Evropa chempionlari kubogi (hozirgi CHempionlar ligasi) sovrinini yutgandi. Ko'pchilik "Real"da o'ynashni orzu qiladi, Xulio esa bunday imkoniyatga ega edi. Murabbiylar Iglesias juda qobiliyatli darvozabon ekanligini va uni yorqin kelajak kutayotganini taxmin qilishardi. Ehtimol, fojiali voqea bo'lmaganida, biz Xulioni buyuk qo'shiqchi sifatida bilmagan bo'lardik.
1963 yilning 22 sentyabrida Xulio Iglesias dahshatli avtohalokatga uchradi va keyingi ikki yilni shifoxonada o'tkazdi: shifokorlarning aytishicha, u mo'jiza tufayligina tirik qolgan. Voqea natijasida Xulioning o'ng oyog'i singan, umurtqa pog'onasi va yuzining chap tomoni jiddiy jarohatlangan. Bunday jarohatlardan so'ng, maydonga qaytishni faqat orzu qilish mumkinligi malum bo'ladi – Iglesias endilikda yurish uchun qattiq kurashishiga to'g'ri kelgan.
"Dastlab qo'rquvni his qildim. Atrofimdagi odamlarning yuziga qarab, vaziyatni tushunishga harakat qildim: omon qolamanmi yoki yo'qmi, deb o'ylardim. Keyinchalik yashab ketishimni bilganimda, bundan keyin qanday yashashni o'ylay boshladim... Menga odamlarning iliq munosabatlari, muloqot etishmasdi va qo'shiq yozib, gitara chalish orqali bularni qidira boshladim..." – deya eslaydi Xulio.
Aynan shu qo'rqinchli davrda u qo'shiqlar uchun musiqa va so'zlar yozishni boshladi.
Xulio o'zi haqida shunday deydi: "Men qo'shiqchi bo'lib tug'ilmadim, men unga aylandim".
SHunday qilib, fojiali voqea bizga o'z davrining eng buyuk qo'shiqchilaridan birini taqdim etdi.
1989 yilda Xulio gastrol safari bilan Moskvaga boradi. O'shanda safar oldidan qo'shiqchi, uni Lev Yashin bilan uchrashtirishlarini iltimos qiladi. Aynan sovet darvozaboni Iglesiasning kumiri edi.
Uchrashuv juda hayajonli o'tgan va Xulio bir muncha vaqt hayajondan o'ziga kelolmay, Yashinning qo'llarini ushlab, o'pgan.
"CA" - nashridan SHerzod Nurmatov maqolasi hala-madrid.uz uchun maxsus tayyorladi.
Kommentlar 1